புதுக்கோட்டை சிவகங்கை ஆகிய இரு மாவட்டங்களின் எல்லைப்பகுதி தேவகோட்டை வட்டத்தில் சானாவயல் கிராமத்தில் மதுரை ஆண்ட பிற்காலப்பாண்டியர்களில் சோழர்களை வென்று கொடி நாட்டிய மன்னர் முதலாம் மாறவர்மன் சுந்தர பாண்டியன் காலக் கல்வெட்டு கண்டுபிடிப்பு.
சிவகங்கை மாவட்டம், தேவக்கோட்டை வட்டம், கொடுவூர் ஊராட்சி மன்றம் சானாவயல் சிற்றூர் கிராமத்தின் வயல்வெளியில் பெருமாள் கோவில் மேட்டில் எழுத்துப் பொறிப்புடன் உடைந்த பலகைக் கல்வெட்டின் கீழ்ப்பகுதி நடப்பட்ட நிலையிலும், கல்வெட்டின் மேற்பகுதி உடைந்த இரண்டு துண்டுகளாகவும் கண்டறிந்த நிலையில் படியெடுக்கப்பட்டது. பிற்காலப் பாண்டியர்களில், சோழர்களின் ஆட்சியை பொண்ணமராவதி யுத்தத்தின் மூலமாக முடிவுக்குக் கொண்டு வந்தவர் கோமாறன் திருபுவன சக்கரவர்த்தி எனும் பட்டமுள்ள முதலாம் மாறவர்மன் சுந்தர பாண்டியன் (பொ. ஆ.1216 முதல் 1239 வரை) அவரது ஆட்சிக் காலம், இவரது ஆறாவது ஆட்சியாண்டில் (பொ. ஆ.1222 ) தை மாதம் தாழையூர் நாடு, சிற்றானூர், திருத்தெங்கூர் உடையார் திருநாகீஸ்வரமுடைய நாயனார் கோவிலுக்காக ஸ்ரீ கோயில் ஸ்ரீ ருத்ர, ஸ்ரீ மாகேஸ்வரர்கள், படிகாரியஞ் செய்வோர்கள் உள்ளிட்ட அனைவரும் செம்பொன்மாரி அரசு மாளவ மாணிக்கம், திருக்கான பேருடையாரான உடையார் மாளவ சக்கரவர்த்திகளிடம் கலிதாங்கி மங்கலத்துப் பொன்பற்றி உடையான் சேந்தனுய்ய வந்தான் செம்பியன் பல்லவரயர் என்பவர் பெயரில் காணி நிலத்தை பிடிபாடு அதாவது பதிவு செய்து கொடுத்த செய்தியைக் கூறும் கல்வெட்டு பதிவு செய்துள்ளது. கல்வெட்டின் அளவு நான்கரை அடி உயரத்துடனும் ஒன்றே முக்கால் அடி அகலத்துடனும் ஒரு அடி தடிமனுடன் உடைந்த நிலையில் மூன்று புறங்களில் 114 வரிகளுடன் கூடிய எழுத்து கற்பலகைத்தூணில் உள்ளது.
இவற்றில் 103 வரிகள் தெளிவாகவும், கல்வெட்டின் இறுதிப்பகுதி முழுவதுமாக சிதிலமடைந்த நிலையிலும் உள்ளது.பாண்டிய மன்னன் சுந்தர பாண்டியன் செம்பொன் மாரியில் தான் சோழரை (பொ. ஆ. 1219) மூன்றாவது ஆட்சியாண்டில் வென்றதாக இலங்கை வரலாறு கூறுகிறது. அச்செய்தியை மெய்ப்பிக்கும் வகையில் அவரின் ஆறாம் ஆட்சியாண்டில் இக்கல்வெட்டு நடப்பட்டிருப்பது முக்கியத்துவம் பெறுகிறது. செம்பொன்மாரி அரசு மாளவ மாணிக்கம், திருக்கான பேருடையாரான உடையார் மாளவ சக்கரவத்திகள் என்பார் சுந்தர பாண்டியன் ஆட்சிக்காலத்தில் மிக முக்கிய அரசியல் அதிகாரம் பெற்றவராக அலுவலராக இருந்துள்ளார். அவருடைய நிலமே கோவில் திருப்பணிக்காக பெறப்பட்டுள்ளதை இக்கல்வெட்டு தெரிவிக்கிறது.
சானாவயலில் உடைந்து கிடக்கும் துண்டு கல்வெட்டு குறித்து பொறியாளர் மா.இளங்கோவன் அளித்த தகவல் படி , புதுக்கோட்டை தொல்லியல் ஆய்வுக் கழக நிறுவனரும், தஞ்சாவூர் தமிழ் பல்கலைக்கழக தொல்லறிவியல் துறை ஆய்வாளருமான மங்கனூர் ஆ.மணிகண்டன் தலைமை தாங்கிய குழுவினர் சமீபத்தில் ஆய்வு செய்தனர். அது குறித்து ஆ. மணிகண்டன் கூறியபோது: ''மேலும், இந்நிலத்தில் அறுவடை செய்யும் பொருட்களில் நெல்லாக இருந்தால் பாதியையும், தினை, வரகு போன்ற நவ தாணியப் பொருட்களாக இருந்தால் கால் பகுதியையும் கோயிலுக்கு கட்டளையாகக் கொடுக்க வேண்டும் என்ற தகவலும் பதிவு செய்யப்பட்டுள்ளது. இந்த ஒப்பந்தமானது, கோப்பலை பட்டன் திருநாஹீஸ்வரமுடையான், மும்முடி சோழன் ஐய்ய நம்பி, திருவேகம்பந் கூத்தாடி கொற்றபட்ட நனாந திருஞாநசம்பந்தப்பட்டந், ஆழித்தேர் வித்தகந், பொந்மா மாளிகைய பிள்ளை, சிகாரியம் சுந்தரப்பெருமாள், கோயிற்கணக்க நாகதேவந், ஸ்ரீமாளவச்சக்கரவத்திகள், கோயிற் தளத்தார்(தேவரடியார்) முன்னிலையில் பதிவு செய்யப்பட்டது.மிழலை கூற்றத்தில் (சங்ககால நாட்டுப் பிரிவின் பெயர்), தாழையூர் நாடு தற்போது தாழனூர் என்றும், சிற்றானுர் சிறுகனூர் என்றும், கலிதாங்கி மங்கலம், கதிராமங்கலம் என்றும், பொன்பற்றி பொன்பேத்தி என்றும், மாறியுள்ளதையும் செம்பொன்மாரி, திருத்தெங்கூர் ஆகிய ஊர்கள் அதே பெயருடன் தற்போதும் அழைக்கப்படுவதையும் அறிய முடிகிறது. இதில் பாதி ஊர்கள் புதுக்கோட்டை மாவட்டத்திலுமுள்ளன.
மன்னர் மாறவர்மன் சுந்தரபாண்டியன் முன்னதாக, தனது தந்தையின் ஆட்சியில் 3-வது குலோத்துங்க சோழன் மதுரையை அழித்து கழுதையை பூட்டி நிலத்தை உழுததாக நேரில் கண்ட சுந்தர பாண்டியன் பின்னாளில் மதுரையை மீட்டதோடு மட்டுமின்றி சோழநாட்டையும் கைப்பற்றினார்.பொன்பேத்தியில் வீர ராசேந்திர சோழர் ஆட்சிக்காலத்தில் புத்த மித்திரன் எழுதிய வீர சோழியம் எனும் ஐந்திலக்கண நூலுக்கு உரை எழுதியவர் பெருந்தேவனார். இவர், புத்தமித்திரரின் முன்னோர்களில் ஒருவரான, பொன்பேத்தியைச் சேர்ந்த சேந்தன் என்பவர், படைத் தலைவனாக இருந்து, இலங்கையில் இருந்த குறு நில மன்னர்களான சிங்களத்து அரையன், வில்லவன் ஆகியோரை வென்ற செய்தியை குறிப்பிடுகிறார்.
“பொன்பற்றி உடையான் சேந்தனுய்ய வந்தானான” என்ற கல்வெட்டு வரியின் மூலம் செம்பியன் பல்லவரயர் என்பவர், சேந்தன் வழி வந்தவர் என இக்கல்வெட்டு கூறுகிறது. மிக முக்கிய வரலாற்றுத் தகவல்களை கொண்டுள்ள இக்கல்வெட்டானது பல வரலாற்று ஆய்வுகளுக்குச் சான்றாகும் என்றார். ஆய்வின்போது மா. இளங்கோவன், உள்ளிட்டோர் உடனிருந்தனர். முதலாவது இங்கு பார்க்கவேண்டியது . மதுரையை யாரிடம் இருந்து பாண்டியன் மீட்டார்?
இரண்டாவதாக மாறவர்ம சுந்தர பாண்டியன். பெயருடன் உள்ள வர்மாக்கள் யார்? சுந்தரம் என்பது தமிழில் அழகன் அது வடமொழிச் சொல்(லாக) இருப்பதையும் கவனியுங்கள்.
நமது காலத்தில் எம்.ஜி.ஆர் தன் அரசியல் களத்தை படு பயங்கரமாக பகுதிவாரியாக கட்டமைத்திருக்கிறார் - மீனவ நண்பன், மதுரையை மீட்ட சுந்தர பாண்டியன், ரிக்சாக்காரன், அடிமைப் பெண், ஆயிரத்தில் ஒருவன், மதுரை வீரன் , குடியிருந்த கோயில். இப்படி பல ஆனால் இதில் பொதுநீதி யாதெனில் மதுரை மீட்ட சுந்தரபாண்டியன் எனும் திரைப்படத்திற்குத் தரும்
முக்கியத்துவம் கூட உண்மையாண வரலாற்றுக் கல்வெட்டுக்கள் மீது மக்கள் ஆர்வம் காட்டுவதில்லை என்பது வருத்தமே
நமது வரலாறு காணாமல் தடயம் அழிந்தாலும் பரவாயில்லை நமக்கு பொய்யான வரலாறு கூறும் பாகுபலி மற்றும் பொன்னியின் செல்வன், மதுரை மீட்ட சுந்தரபாண்டியன் திரைப்படமே போதும் என்பதாக உள்ள நிலை மக்கள் இந்த பொய் மாயையில் இருந்து மாறுவது எப்போது.? என்பதே
கருத்துகள்