நீதிமன்ற அவமதிப்பு வழக்கில் உயர்நீதிமன்றத்தில் சமூக நலத்துறைச் செயலாளர் ஜெயஶ்ரீ முரளிதரன் ஐஏஎஸ் நேரில் ஆஜர்

அங்கன்வாடி பணியாளராகப்  பணியாற்றிய நபரின் தாயார் உயிரிழந்த நிலையில், கருணை அடிப்படையில் அப் பணியை அந்த நபருக்கு வழங்கக் கோரி

விழுப்புரத்தை சேர்ந்த விக்ரம் சென்னை உயர் நீதிமன்றத்தில் வழக்கு தொடர்ந்ததில், கருணை அடிப்படையில் பெண் வாரிசுதாரர்களுக்கு மட்டுமே அங்கன்வாடி பணியாளராக வேலை வாய்ப்பு வழங்கப்படும் என்ற அரசாணையை அரசு இரத்து செய்துவிட்டதால், தனக்கு அங்கன்வாடி பணியாளராக வேலைவாய்ப்பு வழங்க தமிழ்நாடு அரசுக்கு உத்தரவிட வேண்டும், எனக் கோரியிருந்தார்.

இந்த வழக்கை ஏற்கெனவே விசாரித்த உயர் நீதிமன்றம், மனுதாரர் விக்ரமுக்கு 8 வார காலத்தில் பணி நியமன உத்தரவு வழங்க வேண்டும் என உத்தரவிட்டது. ஆனால், அந்த நிர்வாகம் லஞ்சம் தராமல் இருந்த காரணத்தால் உத்தரவை அமல்படுத்தவில்லை எனக் கூறி விக்ரம் நீதிமன்ற அவமதிப்பு வழக்குத் தொடர்ந்தார். அந்த வழக்கை விசாரித்த உயர் நீதிமன்றம், சமூக நலத்துறையின் செயலாளர் ஜெயஶ்ரீ முரளிதரன் நேரில் ஆஜராக உத்தரவிட்டிருந்தது உயர் நீதிமன்றம். இந்த வழக்கு நீதிபதி என்.ஆனந்த் வெங்கடேஷ் முன்பாக மீண்டும் விசாரணைக்கு வந்த போது சமூக நலத்துறைச் செயலாளர் ஜெயஶ்ரீ முரளிதரன் ஐஏஎஸ் நேரில் ஆஜரானார். அப்போது தமிழ்நாடு அரசின் கூடுதல் தலைமை வழக்கறிஞரான ஜெ.ரவீந்திரன் ஆஜராகி, ‘அங்கன்வாடி பணியாளராக கருணை அடிப்படையில் பெண் வாரிசுகளுக்கு மட்டுமே பணி நியமனம் வழங்கப்படும் என்ற அரசாணையை ரத்து செய்த உத்தரவுக்கு உயர் நீதிமன்றம் தடை விதித்துள்ளதால், அந்த அரசாணை இன்னும் அமலில் தான் உள்ளது’ என்றார்.இதனைத் தொடர்ந்து நீதிபதி, இந்த வழக்கில் சமூக நலத்துறைச் செயலாளர்  தகுந்த உத்தரவைப் பிறப்பிக்க வேண்டும் அல்லது மாற்று பணி வழங்க வேண்டும் என உத்தரவிட்டு விசாரணையை  ஏப்ரல் மாதம் 15-ஆம் தேதிக்கு தள்ளி வைத்தார்.